រសៀលថ្ងៃអង្គារ៍ ទី២៨ ខែសីហា ឆ្នាំ២០២៤ វេលាម៉ោង១៤:៣០នាទី ឯកឧត្តម ម៉ាន់ ឈឿន អនុប្រធានគណៈកម្មការទី៧ ព្រឹទ្ធសភា និងជាអនុប្រធានក្រុមសមាជិកព្រឹទ្ធសភា ប្រចាំភូមិភាគទី១ បានអញ្ជើញចូលរួមជាមួយមេភូមិទាំង១៣ និងក្រុមប្រឹក្សាសង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ បន្ទាប់ពីបានស្តាប់របាយការណ៍អំពីវឌ្ឍនភាពការងារខែសីហា ឆ្នាំ២០២៤ រួចមក ឯកឧត្តមបានសំដែងនូវក្ដីរំភើបកោតសរសើរលើស្មារតីរួមសាមគ្គីគ្នាយ៉ាងរឹងមាំរបស់បងប្អូនប្រជាពលរដ្ឋ រួមជាមួយគណៈបញ្ជាការឯកភាពរាជធានីភ្នំពេញ ធានាគ្រប់គ្រងទប់ស្កាត់បានយ៉ាងទាន់ពេល និងមានប្រសិទ្ធភាពលើពួកជ្រុលនិយមដែលមានឧបាយកល បំផ្លាញការរស់នៅដ៏សុខសាន្តរបស់ប្រជាពលរដ្ឋនិសង្គមជាតិ។ សម្រាប់ទិសដៅការងារខែកក្កដា ឆ្នាំ២០២៤ គឺត្រូវផ្តល់អាទិភាពលើ ៖ ១-បន្តការងារភូមិ សង្កាត់ មានសុវត្ថិភាព ២-ចុះតាមខ្នងផ្ទះលើកទឹកចិត្តយុវជនដែលមានអាយុត្រូវចុះឈ្មាះបោះឆ្នោត ៣-បន្តចុះសម្ភាសន៌ធ្វើប័ណ្ណសមធម៌ជូនគ្រួសារក្រ១ និងគួសារក្រ២ រួមសហការជាមួយមន្ត្រីក្រសួងផែនការ ៣-បន្តលើកទឹកចិត្តទទួលការចូលរួមបរិច្ចាគថវិកាដោយស្ម័គ្រចិត្តរបស់ប្រជាពលរដ្ឋ ជូនមូលនិធិអភិវឌ្ឍន៍កសាងហេដ្ឋារចនាសម្ព័ន្ធតាមបណ្តោយព្រំដែនមាតុភូមិកម្ពុជា។ ឆ្លៀតឱកាសនោះឯកឧត្តម ក៏បានផ្តល់ប័ណ្ណសមធម៌ជូនគ្រួសារក្រីក្រ និងបានឧបត្ថម្ភថវិកាជូនសមាគមថែទាំសុខភាពមនុស្សចាស់សម្រាប់ខែកក្កដា ក្នុងបរិយាសស្និទ្ធស្នាលរីករាយក្រៃលែង។
